दूधदरासाठी शेतकरी राज्यभर आक्रमक

गाईच्या दुधाला किमान प्रति लिटर चाळीस रुपये दर द्यावा, या मागणीसाठी राज्यातील अनेक भागांत शेतकरी आक्रमक झाले आहेत. दोन दिवसांपासून किसान सभा आणि दूध उत्पादक शेतकरी संघर्ष समितीकडून राज्यात आंदोलने, निदर्शने सुरू आहेत. तर स्वाभिमानी शेतकरी संघटना सोमवारपासून (ता. १) राज्यभर आंदोलन करणार आहे. त्यामुळे दूधदर आंदोलनाची धग दिवसेंदिवस वाढत चालली आहे.