हळदीचे दर वाढण्याची शक्यता

या सप्ताहात हळदीच्या किमतींनी उसळी घेतली. स्थानिक व निर्यात मागणी यावर्षी वाढती आहे. एक अंदाजानुसार यावर्षी हळदीच्या उत्पादनातसुद्धा वाढ अपेक्षित आहे; मात्र त्याविषयी खात्री नाही. उत्पादनासंबंधी उलट-सुलट वार्ता येत आहेत. त्यामुळे भावामध्ये मोठ्या प्रमाणावर चढ-उतार होत आहेत. या सप्ताहात गेल्या सप्ताहाच्या तुलनेने स्पॉट किमतीत ९ टक्क्यांनी तर एप्रिल फ्युचर्स मध्ये १४ टक्क्यांनी वाढ झाली. स्पॉटच्या तुलनेने मे व जून फ्युचर्स भाव फारसे आकर्षक नाहीत. ते फक्त १ ते २ टक्क्यांनी अधिक आहेत. गेल्या तीन वर्षापेक्षा या वर्षी आवक कमी आहे. भाव वाढण्याची शक्यता आहे.