मराठवाड्यात रब्बी पेरणीची गती मंद

मराठवाड्यातील आठही जिल्ह्यात सर्वसाधारण क्षेत्राच्या तुलनेत केवळ ७९ हजार १३ हेक्टरवरच रब्बीची पेरणी झाली आहे. पावसाळ्याच्या अखेरच्या टप्प्यात व पावसाळा संपल्यानंतर आलेल्या जोरदार पावसाने अनेक भागात पेरण्या खोळंबविण्याचे काम केले आहे. मराठवाड्यातील लातूर व छत्रपती संभाजीनगर या दोन विभागीय कृषी सहसंचालक कार्यालयाअंतर्गत येत असलेल्या आठ जिल्ह्यात रब्बीचे सर्वसाधारण क्षेत्र २१ लाख ५ हजार ११० हेक्टर इतके आहे. त्यामध्ये छत्रपती संभाजीनगर कृषी विभागातील तीन जिल्ह्यातील ७ लाख ४१ हजार १८० हेक्टरसह लातूर कृषी विभागातील पाच जिल्ह्यातील १३ लाख ६३ हजार ९३० हेक्टर क्षेत्राचा समावेश आहे.